6th

2006年8月頭某日。係呢間公司見工。見工時都唔知入面有幾多人。因為係公司出面個房仔到interview。見完第一次。好快就second in。再好快就番工。8月22日。正式第一日番工。入到去。嘩。。坐滿晒人架wor。。（公司好似5000呎）。感覺呢到氣氛幾好。人人第一日番工都好似薯仔咁。唔多出聲。周圍望。好奇心係超重。XDD 。那時候我係shipping dept。由於係前公司有經驗（都係打單。打airway bill。寄貨）。所以第一日番工已經叫有野做。話說好多時都係番左好幾日工先有人得閒教 d 新黎既孤兒仔做野架。個陣覺得公司d氣氛好好。（叫人多掛）。。

個時成個dept得兩個人。但都已經有分大同細。hmmm。。有d同事都同我講過「你阿姐係小辣椒黎架」。。嘿嘿。。我話知佢乜椒物椒。。其實我都係做野架jei。。做錯野俾人鬧係正常。。而且我既工作好簡單。但佢既脾氣又的確好難頂。我地坐一前一後。d 同事遲左拎d單出黎打個陣。佢就開始黑面。掟筆。大大力閂櫃桶。個時都仲係番5日半。而且當時生意好。星期六都係做足全日。我都冇所謂。想當年仲叫細咪當搏下囉。屋企人成日教「唔辛苦點得世間財」丫嘛。不過時間耐左。就覺得佢愈來愈過份。個時佢最鐘意話「嘩。我老幾呀？」嘿嘿。我真係唔知你老幾。我只係覺得你好討厭。個陣佢一癲我又頂唔順。我要忍到放工出樓梯口先有得喊下。。。個時都已經有d 同事會同我傾下計架喇。XDD。因為 d人都話佢癲架嘛。。個時經常性 OT 到12：00am 。都試過做到2：00am。。（所以我好憎人ot到9：00就話自己好慘）

差唔多做左一年。我頂唔順。個時個男朋友都聽我呻唔少好辛苦。haha。我都唔記得左喊濕左佢個膊頭幾多次lu。但我走唔甩。因為咁岩sales teams有人走。傾傾下。我就順理成章轉左去做sales coordinator。成為UCO（US Sales Team)其中一個成員。。那時候還好啦。因為係shipping個時都會接觸到佢地。都叫做nice既。係sales team有新野學。工作上展開左新一頁。由起初怕handle唔到。。。。直至到。。。。現在2012。。。。

我都唔記得我邊一年咭片變左做sales executive喇。。或者因為年資掛。之後會開始試下自己坐下客。呵呵。全大既滿足感應該係。。係個客面前計價囉。因為 d 客個個都用唔同既鑽石。所以鑽石價要記得好清楚。金價就易喇。上網望一望就得。我最怕計個d 一件貨有10幾種石既貨。因為真係計到曲街架。例如鑽石再加幾類晶石咁啦。粒粒石都唔同價錢。真係計到手軟。CT 幾錢卡？BT又幾錢？。。計到個人超抑鬱。所以有時我好倒米。完show做報價。我會唔報 d 多石既野。但有時勁樣衰。因為 d 客會記得。。。佢地會問“e。。個隻什色介子呢？“。。。＝＿＝“。。。


係UCO。都算得上係自由。因為我有個好大佬。佢從來都唔會push我地去做任何野。佢俾我地做既野。從來唔會放落黎之後同你講。。“你今日做埋俾客“。“最遲聽日俾我“。。佢俾野我地做。佢口頭禪咪係。。“得唔得閒呀？俾 d 野你玩丫“。。“可唔可以幫我做d 野呢“。。語氣係very客氣。起初我係UCO。。我係一隻鵪鶉黎架咋。（因為我都可以好癲）。個陣咁岩新黎報到sales team當然要聽聽話話啦。。加上大佬冇脾氣又好人。咪做好孩子囉。。。

久而久之。。sales team第2年。開始有機會出門去Italy。Swiss。US..放眼看世界。
但其實放一。兩次好喇。當你去親都係同一個會場。食埋同一樣野。出門執頭執尾仲辛苦過係公司做野你就知味道。。 後來team入面最friend個個走左。而且我地因為 d 誤會而反左面。（反左面至今到而家我仲好在乎呢一個人。即使而家有時係show場見到佢。唔知係為啖氣定冇勇氣。我地見到面都唔會打招呼。。＞＜其實內心都不知幾想問。“最近點呀？“)。。好好好。。廢話少說。。

自從最夾得到既同事走左之後。不安就開始黎喇。先黎講下2008年。公司炒左8個事。又冇左一個sales team。2008年5月。成間公司既人都已經唔係我2006年咁。炒既炒。走既走。唉。。冇所謂啦。出黎做野就係「東家唔打。打西家」嘛。但。。係。。。之後再請既人都係。。。超奇怪。。就好似而家坐我後面個兩位。。。。。。。

2007年因為shipping個阿姐。我想走。到2008年。炒8個人。我想走。之後每一年到8月我都好想走。結果呢。留到今年2012喇。。。。「我。真。係。頂。唔。順」。。今日開始發現我同我大佬唔多夾到喇。。呢個都唔係一個導火線。。導火線係坐我後面個兩位同事。佢地同期入黎既。應該有兩年幾架喇。。。一男一女。。先講個男既。。。

係公司秘書介紹佢入黎做。40歲人未做過珠寶。屎忽痕轉工經秘書介紹入左黎公司。唉。。冇所謂呢。但聽講佢之前好勁架wor。但我就睇唔出喇。只係見到呢個屎忽ghost好似想一黎到就一步登天咁囉。個時成日同大佬講：「小心呢個人食足你都唔知」。。之後佢對珠寶既認識又唔多。但佢個勢好似要食住成team咁。我當然唔會咁佢咁做啦。。。嘿嘿。我同我大佬講：「你唔會俾呢個人點我做野掛？你試下俾佢點我做野。我即走」。。嘿嘿。。時至今日。呢個屎忽ghost同事都冇叫我幫佢手。只係聽話佢叫同期入黎既女同事幫佢print sales order 囉。。。好啦。閒人唔講太多喇。一陣先加埋一齊講。。。

那個女的。勁呀。我做左咁多年都未試過唔見貨。但佢最近唔見左兩隻bangle。成個解釋出黎既結果得出黎係。。「公司可能有鬼」。。一係個兩隻bangle有腳自己走左佬啦。。公司佢兩個叫新。老闆因為呢件事。全公司開左一個會。老闆竟然話「有邊個同事拎左兩隻bangle好拎番出黎喇」。。ok！！！言下之意。即係佢認為公司有小偷啦。。。大家聽完之後都認為呢句說話十分un耳而且。。原來老闆跟本都唔信我地。。。唔見貨既呢位女同事。推卸責任。竟然話自己冇收過隻bangle但又見過。又話拎過俾design影相。。」wtf！？即係點呢其實。我唔會懷疑任何人。但就唔好推卸責任囉。。。（話說其實呢位女同事個枱面係出事前係經常性亂到仆街的）有報紙數份。膠樽數個。鋁鑵又數個。（人家說要儲埋拎去回收嘛）。。結果。。自唔見左貨之後。sales要做多好多野。佢都成為大部份人既犯眾憎。之後我俾說話佢聽。黑佢面左一段日子。因為佢令到我地都變成老闆心目中既「賊」。。

唔見貨。。知道出事那天開始。呢位同事都冇乜特別見到佢唔開心或者有個奶野樣。後尾有同事同我講番。原來個位同事認為「開心又一日。唔開心又一日。點解唔開開心心咁過呢」＆）＄＆）＠＄）！！！我相信如果發生係我身上。我會怪自己點解咁粗心大意。。ok！即使係咁 。就咁老闆認為係自己人偷既時候。我同其他同事都唔開心左一排。因為。。原來佢根本就唔信我地。。。。。。

好了。最近大佬去左russia見客。佢叫我幫佢準備d 圖見客用。。。
我知佢係見個屎忽ghost既客。我講過我唔會幫佢手。因為佢做野慢。我同大佬講。
我：「點解唔叫佢自己做。個個係佢既客黎。個客要咩佢最清楚」
ken：「佢有張大單開呀。。」
我：「有幾大。。」
ken：「200幾條line。。」
我：「200幾ja ma。。唔使改版。半日都開完啦。佢做左兩年幾架喇，要長大架喇」
ken：「咁你都係時候長大啦。。」
我：「ok！你有冇覺得佢做野好慢？」
ken：「覺呀！係好慢。。但佢個個年代應該係咁」
我：「咩叫個個年代。咁即係冇進步既？唔會追番而家呢個年代既野？（屎忽ghost連excel都唔識用）你有冇話過佢架？」
ken：「你估我有冇」

唔使估喇。。呢段對話。。我好失望。。。

 （打到呢到。。其實我已經喊到曲街了。因為真係好失望）

最後。還是死死氣幫佢做準備。

今天。2012年8月20日。又再sales meeting。那個女的又奶野。
個客4個月前寄左d 貨番黎要repair。但時至今日。佢都未做。個客就嘈到老闆到。點知呢位女同事仍然笑面迎人答。「其實我有出email問佢關於repair既野。但佢冇覆過我」當時我睇住佢隻腳係枱底下腳fing fing。。我真係好想問。。「點解你仲笑得出？」好啦。。開完會。佢竟然拎個file打大佬。聲線提高8度話「關我咩事？」。。嘿。。個時我真係好想爆。好想大大聲咁話「仆街。個客你跟架！！唔關你事關邊個事呀？」。好啦。。。繼而佢就喊喇。。我又好想佢：「你喊乜春呀你」。。但我認為佢喊唔係因為佢又得罪左個客而係。。。佢只係想扮下可憐。。。


勁呀？係房開會個陣笑笑口解釋。出到黎打完大佬又喊。。痴x線。。


最近。出親貨都俾客投訴到仆街。 錯不在我。鑽石因為鑲工問題攪到灰灰黑黑。
問有關同事。佢地會答。「係咁架喇。有錢咪用靚d 既石囉。」
最後。發現原來係件貨都未洗乾淨。結果冇一個部份肯認。
結果。。我野野硬食。。。

今日食完lunch。我諗左好耐。都問左自己一個問題。。
我問：「喂．劉小姐。後日6年喇喎。真係 3 年又3 年。仲想點呀？仲唔走？冇架喇呢到。。」
我答：「係囉。係時候喇可？」 （人格分裂嗎？＝＿＝“）

或者係自己種既孽啦。屋企人細個成日教。「做野唔好怕蝕底」
呢 6 年。

出show一個人去買10幾個人既飯盒俾佢地食。仲要俾人投訴。
得閒時幫下其他同事手。到自己忙到仆街既時候。想搵人幫手分擔時。冇之餘。仲要話「我都唔使你幫。係你自己主動問我使唔使幫ja ma」
從來都唔會話「男女有別」。粗重野一定要男人做。show 場既cctv我爬上爬落都幫手攪掂。
幾千件貨。一個人入機。一個人pack喼。一個人準備。。。。

UCO係我眼中從來都係「一盤散沙」
好啦好啦。成日提自己「做好自己就算」。。但點解硬係要黎攪我。。
或者就係朋友爆晒粗咁鬧我。「就係因為你唔怕蝕底囉！！7頭！！」

ok。我明了。。。
嘿。。希望仍然有氣力挨到年尾。。。。
但更加希望我有勇氣離開呢一到。。原來打份工打得耐。。
都會唔捨得。都要有勇氣離開。。。。



嗚。。。